CEBU, Philippines - Apilon pagkiha sa kapolisan ang mga tagdumala sa lugar diin didto gipahigayon ang paghulagway sa hubo nga kababayen-an nga ang mga ebidensya nahuptan na karon sa mga polis.
Mao kini ang bahad ni Lapu-Lapu City Acting Police Director Armando Radoc human niya mandoi ang iyang mga operatiba nga mohimo og pakisusi sa mga lugar diin gipahigayon ang pictorials sa mga babaye nga naghubo. Kini base sa ilang nakita sa mga hulagway ug videos nga nasakmit gikan ni Jaypee Corilan nga nasikop atol sa entrapment operation kaniadtong Martes.
Sa maong mga larawan makita ang swimming pool ug mga background ug matud ni Radoc nga ang mga tag-iya sa maong mga lugar adunay dakong tulobagon sa gihimong illegal nga kalihukan ni Corilan. Ang motel diin nasikop si Corilan nasuta nga walay tulobagon gumikan kay usa kini ka dapit alang sa pribado nga kalihukan ug ang mga tagdumala wala masayod sa ilang gibuhat sulod sa maong lawak.
Samtang si Senior Inspector Rogelio Peneda sa City Anti-Illegal Drug Operations Task Group ug Inspector Judith Besas sa Women’s and Children’s Protection Desk mipasaka na og kaso batok ni Corilan didto sa piskaliya.
Kasong kalapasan sa Republic Act 9208 kon Anti Human Traficking Act ug Republic Act 9995 kon Anti Photo and Video Voyeurism Act of 2009 ang gipasaka. Giawhag ni Peneda ang ubang biktima ni Corilan sa pagdangop sa ilang buhatan aron malakip kini sa pagpasaka og kaso batok sa suspetsado. (BANAT NEWS)