CEBU, Philippines - Gipasaka na kapolisan ang kasong robbery batok sa tulo ka tawo nga nadakpan human mangawat og gibana-banang moabot og P1 milyon sa usa ka supermarket sa Barangay Mantuyong, dakbayan sa Mandaue.
Si SPO3 Marcos Noval Jr., imbestigador sa Investigation Detection and Management Bureau (IDMB) sa Mandaue City Police Office (MCPO), miila sa tulo nga sila si Jose Niño Zamora, 29, Romulo Jurado, ug Ariel Macapaz, 30, taga Barangay Lutopan, Toledo.
Si Jurado nga gwardya sa supermarket maoy unang nadakpan sa kapolisan didto sa Boljoon dihang gikatingad-an ang gidala nga plastic bag daghan og sulod nga kuwarta.
Human si Jurado nadakpan, iyang gitug-an ngadto sa kapolisan ang lain niyang mga kauban mao nga nadakpan.
Matud ni SPO3 Noval nga si Jurado mitug-an kanila nga misulod sila sa bodega ug nagtabon sa karton hangtod nga naabtan sila sa pagpanira sa pagkagabii. (BANAT NEWS)