CEBU, Philippines - Mokabat sa P205 mil ang kantidad sa mga alahas ug ubang butang nga nadala sa kawatan kinsa milungkab sa balay sa usa ka huwes niadtong Biyernes sa buntag diha sa barangay Labangon, dakbayan sa Sugbo.
Ang biktima mao si Judge Victor Teves sa Lapu-Lapu City Regional Trial Court kinsa nawagtangan sa iyang Samsung Galaxy Note nga nagkantidad og P20 mil, MyPhone cellphone, identification cards, ATM ug credit cards, reward cards, bracelet nga nagkantidad og P120 mil, usa ka set sa ariyos ug sing-sing, P75 mil ug usa ka singsing nga nagkantidad og P10 mil.
Sila si SPO4 Rogelio Cañete, Jr., PO3 Reglyn Pepito, PO3 Robert John De Castro, PO3 Renato Berido ug PO2 Henry Alejandro ang miresponde sa maong insidente human makadawat og report gikan ni Erico Butalid, security guard sa gipuy-an sa biktima. Sa imbestigasyon sa kapolisan ang kawatan misaka sa sementadong koral ug giguba ang screen sa bintana sa balay sa biktima. - /EIM (BANAT NEWS)