CEBU, Philippines - Kapin sa usa ka milyon ka pesos nga balor sa mga alahas ang nakuha sa tulo ka gidudahang Salisi gang nga mikuha sa bag sa usa ka lalaki sud sa usa ka restaurant sa usa ka mall sa barangay Mabolo sa dakbayan sa Sugbo sa miaging gabii. Ang biktima naila nga si Miguel Roda, 62, molupyo sa 55 Roces Avenue, Quezon City.
Si PO3 Virginia Caminog nga nahinabi sa Banat News miingon nga igo na lang mireklamo sa presinto ang biktima human wala na gyud niya igkita ang iyang bag.
Ang maong bag may sulod nga tulo ka Rolex nga relo nga mobalor og P800 mil duha ka bracelets nga mokantidad og P250 mil. Atoa sab sulod sa bag ang ATM card, passbook sa bangko, passport, birth certificate ug duha ka bulawan nga singsing sa biktima nga mobalor og P35 mil.
Matud pa ni Caminog nga nagkaon ang biktima sa maong restaurant ug gibutang ang iyang bag sa salog duol sa iyang tiilan, apan may usa ka babaye ug duha ka lalaki nga kalit lang miali kaniya ug mibalda sa iyang atensyon.
Gipatiran diay sa usa ka suspek ang iyang bag ug nakuha gyud kini apan ang usa ang milipat-lipat kaniya samtang siya nagkaon.
Wa gilayon makabantay ang biktima nga wala na diay ang iyang bag tungod kay padayon lang kini og kaon.
Dihang nabantayan niya nga nawala na ang iyang bag dali kining mi-report sa kapolisan apan wa na gyud marekober pa ang iyang bag ug ang iyang alahas. Padayon ang imbestigasyon sa kapolisan sa Mabolo sa pag-ila sa tulo ka mga Salisi gang. (BANAT NEWS)