Gipugos pag-abli ni Bacaltos ang gisirad-an niyang opisina

CEBU, Philippines - Gipugos pag-abli kagahapon ni Talisay City College Acting President Ritchel Bacaltos ang iyang opisina nga gi-padlock ni Mayor Johnny Delos Reyes.

Giangkon ni Bacaltos nga siya ang nagsugo nga ipalangkat ang usa ka pligo nga plywood nga gitaptap sa bildo nga pultahan, apil sa opisina sa school registrar.

Gipahikay na usab ni Bacaltos ang tukmang kaso nga ipasaka batok ni Mayor JVR tungod kay iyang giisip nga supak sa balaod ang gihimo sa mayor nga gipasirad-an ang ilang opisina.

Ang mayor mitataw nga gipasirad-an niya ang opisina ni Bacaltos aron dili maglibog ang mga tinun-an kun asa sila mo-transact og dukomento kay si Dr. Paulus Cañete na ang gitudlo niya nga acting president.

Matud ni JVR nga wala gayud siya malisang kun si Bacaltos mopasaka og kaso batok kaniya. Miinsistir si JVR nga si Cañete lang ang kwalipikadong molingkod pagka presidente sa TCC.

Apan si Bacaltos miingon nga walay pagtugot sa Board of Trustees ang pagtudlo ni Mayor JVR kang Cañete mao nga maisip kini nga kwestyonable.

Si Talisay City Attorney Alfredo Sipalay miingon nga tun-an nila kun unsa nga kaso ang ikapasaka nila ni Bacaltos tungod sa pinugos nga pag-abli sa iyang opisina.

Ang acting school registrar nga si Loulette Zafra nagkanayon nga balik na sa normal ang ilang operasyon ug kun adunay personnel nga ipadala ang mayor nga pasiradohan na usab ang ilang buhatan pangayoan nila kini og “court order”.

Ang TCC dunay 2,126 ka estudyante karon diin 721 sa undergrad ug 66 ang graduate school nga gikatakdang mogradwar niining tuiga. (/RUB)(BANAT NEWS)