CEBU, Philippines - Usa ang patay ug laing usa ang grabeng naangol nga biktima sa pagpamusil kagahapon sa hapon diha sa Phase 1, Barangay Pulpogan, lungsod sa Consolacion.
Wa nay kinabuhi si Allan Ebalan, 37, nga taga Pitogo sa maong lungsod ug ang naangol mao ang iyang silingang si Vincent Vibar, 37.
Wala pa mailhi sa kapolisan ang nagpusil sa duha nga giingong naglakaw lang padung sa duha ug kalit namusil.
Si PO1 Michael Villardar miingon nga si Ebalan naigo sa iyang ulo samtang sa bukton ug tiyan usab ang samad pinusilan nga naangkon ni Vibar. Human niini, yano gihapong milakaw palayo ang mamumuno.
Daling gihatod ang duha ngadto sa Eversely Child Sanitarium General Hospital apan si Ebalan gideklarar nga patay na samtang si Vibar gibalhin ngadto sa Vicente Sotto Memorial Medical Center sa dakbayan sa Sugbo. Matud pa ni Villardar nga ang namatay nga si Ebalan nga dugay na nilang gipanid-an tungod kay gikatahapan kini nga nalambigit sa illegal nga drugas. (BANAT NEWS)