CEBU, Philippines - Ang Alliance of Progressive Labor (APL) nag-andam na sa gikinahanglang dukomento aron ipasaka niini pag-usab didto sa Regional Tripartite Wages and Productivity Board (RTWPB)-7 alang sa pagpangayo’g dugang usbaw nga sweldo sa mga mamumuo.
Ang pangulo sa APL nga si Jose Tumongha miingon nga ang bag-ohay pa lang giaprobahan nga P13 nga Cost of Living Allowance (COLA) sa RTWPB dili maisip nga usbaw sa sweldo mao nga makademanda pa gihapon sila og dugang suholan.
Nagpabilin pa nga P367 ang minimum nga sweldo dinhi sa dakbayan sa Sugbo ug minus og gamay sa ubang mga dapit, ilabi na kadtong mga nagtrabaho sa kaumahan.
Ang makadawat sa P13 nga COLA kadto ra ‘sab nga mga kawani nga nagsweldo lang og minimum.
Ang bug-at nga rason sa APL pagdemanda og umento sa sweldo mao ang pag-usbaw sa prisyo sa mga nag-unang palaliton ug ang gilaraw nga pagpausbaw sa pletehan ug bayranan sa tubig sa Metro Cebu Water District.
Didto sa City Hall kagahapon ang mga konsehal sa dakbayan miawhag ni MCWD General Manager Armando Paredes nga mopahigayon gayud og public hearing sa dili pa mopahamtang og usbaw sa bayranan sa ilang tubig. Ang RTWPB mibasura na sa demanda sa mga mamumuo nga usbawan ang ilang sweldo.
Matud ni Tumongha nga kun midemanda sila og P132.00 nga usbaw sa suholan kaniadto, karon mas ubos na ang kantidad nga ilang pangayoon sa RTWPB.
Gitataw ni Tumongha nga dili sila mohunong pagdemanda nga usbawan ang sweldo sa mga mamumuo tungod sa “supervening condition†nga nakaapektar sa pagpuyo sa mga trabahante sa rehiyon. (BANAT NEWS)