CEBU, Philippines - Giawhag sa kadagkoan sa Department of Education (DepEd-7) ang mga Sugboanon nga bag-ong nakapasar sa Licensure Examination for Teachers (LET) nga mo-apply sa ilang buhatan.
Matud ni DepEd-7 Regional Director Carmelita Dulangon nga ang maong mga bag-ong maestra makatabang kaayo pagtudlo sa nagkadaghan nga mga tinun-an sa Sugbo ug tibook rehiyon.
Si Dulangon miingon nga dako kaayo og panginahanglan sa mga magtutudlo ang Central Visayas apan wala siya makabutyag kun pila ang ilang gikinahanglan.
Ang awhag ni Dulangon iyang giluwatan tungod kay daghan sa mga bag-ong nakapasar nga nagplano nga molangyaw aron adto manarbaho sa ubang kanasuran nga dagko og sweldo.
Dinhi sa Sugbo, unom ang nalakip sa mga topnotchers sa LET nga gihimo kaniadtong Enero.
Sa kinatibuk-an nga 38,377 ka examinees sa elementary level, ang 11,120 lang kanila ang nakapasar samtang sa 42,358 nga mikuha’g pasulit sa secondary level, kapin lang sa 12,000 ang nakapasar. (BANAT NEWS)