CEBU, Philippines - Daw nahimong komedya ang eleksyon nga gipahigayon sa nasud sa North Korea tungod kay usa ra ka tawo ang gibotaran sa mga botante ug wa nay lain kondili ang ilaha rang presidente nga si Kim Jong Un.
Si Kim lang maoy nakabutang nga pangalan ug wala nay lain pa sa ilang ‘listahan’ sa mga piliang lider maong way laing ikabutang ang mga botante kondili ang ilaha ra gyung presidente.
Ang state media sa North Korea miingon nga ang ilang supreme leader nga si Kim wa mabotohi sa highest legislative body sa North Korea, siya ang midaog via unanimous approval sa iyang distrito nga may 100 percent turnout.
Ang mga North Koreans nibotar niadtong Domingo aron aprubahan ang bag-ong gitudlong mga deputies sa Supreme People's Assembly( ilang lehislatura).
Ang maong botasyon giisip lang nga usa ka political ritual inay nga tinud-anay nga election kun itandi kini sa ubang mga nasud ug himuon kini kada lima ka tuig.
Bisan wala pa gani ipagawas ang resulta sa botasyon, ang media (nga kontrolado usab sa ilang gobiyerno) mianunsyo nang daan nga si Kim midaog sa iyang distrito sa Mount Paekdu — way bisan usa ka balota nga mikontra kaniya. (BANAT NEWS)