CEBU, Philippines - Tawo nga nabilanggo kaniadto tungod sa paghupot og armas apan nakagawas ug nag-drive na lang og traysikad gipusil-patay samtang nagpahayahay atubangan sa iyang balay sa Barangay Tuburan Sur, dakbayan sa Danao.
Si Archie Lawas, 32, nakaangkon og duha ka samad sa iyang lawas agi sa bala sa .45 kalibre nga pistola ug ang usa ka bala milapos sa buko-buko sa biktima.
Ang kapolisan miingon nga wala sila masayod nga adunay laing kaso nga gikalambigitan ang biktima gawas niadtong pagkabilanggo niya tungod sa illegal possession of firearms.
Wala usab masayod ang kapolisan ngano nga nakagawas si Lawas sa bilanggoan.
Matud ni PO3 Roselo Campo nga naglingkod gawas sa iyang balay ang biktima dihang miabot ang duha ka tawo nga nagsakay og motorsiklo.
Ang backrider kalit lang mipusil sa biktima makalima ka higayon ug dali nga mipasirit og padagan.
Gidali pagdala ang biktima sa Danao District Hospital apan wala na maluwas.
Lima ka kabhang sa kalibre 45 nga bala ang napalgan sa dapit nahitaboan. (BANAT NEWS)