CEBU, Philippines - Laing 120 pa ka pamilya sa Barangay Apas, dakbayan sa Sugbo ang gikabalak-an nga mawad-an na usab og kabalayan kay adunay mipasaka og kaso nga Ejectment didto sa hukmanan aron sila palayason gikan sa yuta nga ilang gipuy-an.
Ang presidente sa Ark Angel Unified Homeowners Association nga si Rosalinda Leogan kauban ni Apas Barangay Kapitan Ramil Ayuman mipakita sa media sa dokumento sa ejectment case nga gipasaka ni Richard Unchuan batok sa mga nagpuyo sa Lots 943, 944, 945, ug 946 sa Sitio San Miguel.
Ang kaso nga gisang-at ni Unchuan didto sa Municipal Trial Court in Cities (MTCC) wala pa maresolbar gikan niadtong 2012 human nga miduso og Petition for Injunction ang 120 ka pamilya kang kansang kabalayan duol ra sa Lots 942 ug 947 nga gisugdan na og demolish sa miaging semana.
“Wala pa na niya (Unchuan) maasikaso karon kay na-busy pa man siya anang sa lots 942 ug 947,†matud pa ni Leogan. Nagtoo siya nga si Unchuan mao usab ang nagpaluyo sa demolisyon sa Lot 942 ug 947.
Si Ayuman ug ang mga residente nagtuo nga si Unchuan mao ra usab ang nag-finance ni Aletha Suico-Magat, ang nanag-iya sa lots 942 ug 947. Hinoon gipanghimakak ni Unchuan ang pasangil apan giangkon nga mipasaka siya og Ejectment Case sa mga nagpuyo sa upat ka luna. Si Unchuan, usa ka magpatigayon, nagkanayon nga wala siya’y gahum pag- impluwensya sa desisyon sa Korte Suprema, kinsa nihatag kang Magat og deed of reconveyance sa Lots 942 ug 947 niaging Disyembre 2011. (BANAT NEWS)