CEBU, Philippines - Upat ka tawo ang nadakpan sa entrapment operation sa mga sakop sa Criminal Investigation and Detection Group (CIDG)-7 tungod sa pasangil nga namaligya sila og peke nga gold bars sud sa usa ka kan-anan sa General Maxilom Ave., ning dakbayan sa Sugbo niadtong Biyernes sa gabii. Ang entrapment operation gihimo tungod sa reklamo ni Manuel Santos ug higala nga si Virginia Baruffol tungod kay nagduda silang nailad sila sa mga unom ka suspek.
Apan upat lang sa mga mangingilad ang nadakpan nga giilang sila si William Estrella, nga taga Toledo City, Soledad Dy Divinagracia ug anak niining si Rex Divinagracia, pulos taga Barangay Cogon, Bogo City; ug usa ka Everett Rosendo, sa Toledo City.
Ang upat gidakop human mangayo og bayad nga P5 million nga advance payment sa mga gold bars nga balor P10 million, nga ang tinuoray diay ginama lang sa ordinaryong metal sama sa bronse ug tingga. Base sa affidavits nila ni Santos ug Baruffol mokabat na sa P300,000 ang ilang nahatag sa grupo lakip ang ilang uban pang expenses. Matud pa nga niadtong Agosto sa milabay’ng tuig gitawgan si Santos ni Soledad aron paarion sa Sugbo kay dunay baligyang 50 ka mga gold bars, gani ang manag-amahan pang Soledad maoy migastos sa plete ni Santos pag-anhi sa Sugbo ug nagkita sila sa usa ka resort sa downtown hotel diin ilang gipakitaan si Santos sa litrato sa gold bar.
SPO2 Roel Leyson, miingon nga kasong syndicated estafa ang ilang napasakang kaso kagahapon ug way piyansang gitugot kanila. Ang mga suspek wala motingog dihang gipangayoan og habig sa mga sakop sa media. (BANAT NEWS)