CEBU, Philippines - Ang Department of Health (DOH-7) nipagawas na usab og pahimangno ngadto sa mga mag-uuma nga magbantay nga dili mabiktima sa heat stroke panahon sa huwaw sugod karong bulana.
Si Bernadine Ayag, assistant head sa DOH-7 Health Promotion and Education, miingon nga gawas sa mga tanom ug kahayopan, ang mga mag-uuma gikinahanglan usab nga magmatngon sa grabe nga kainit dala sa El Niño.
Matud ni Ayag nga adunay posibilidad nga tungod sa naghinobra nga kainit, atakehon sa heat stroke ang usa ka tawo.
Misugyot si Ayag nga ang mga mag-uuma angay’ng mosayo pag-adto sa ilang umahan nga dili pa kaayo init ug mopauli na kun init na ang panahon.
Tambag usab ni Ayag nga nagkinahanglang magsul-ob usab og kawo ug tag-as nga senina ang mag-uuma ug mga tawo alang sa proteksyon niini gikan sa init ug kinahanglan nga moinom og daghang tubig aron paglikay nga ma-dehydrated. - /RUB (BANAT NEWS)