CEBU, Philippines - Gihulagway ni Aberdobey Belleza ang presidente sa Talisay Aqua City Gun Club nga dakong kahasol alang kanilang mga responsableng nanag-iya og armas ang sentralisadong pag-renew sa lisensya niini.
Dugang ni Belleza nga “pwerting hasola†ang bag-ong pamaagi sa pagrehistro sa ilang armas tungod kay kinahanglan pa nila nga moadto sa Camp Crame aron lang marehistro ang iyang armas. Miingon si Belleza nga kun nahimo kini sa uban mga buhatan sa gobiyerno nga sa mga rehiyonal nga buhatan buhaton ang pagproseso sa ilang mga transaksyon nganong sa pagrehistro dili man mahimo.
Sayon lang unta sa mga tawo nga sama kaniya nga mo-renew sa rehistro sa ilang mga lisensya sa armas kun sa rehiyonal nga buhatan apan mas labaw pang maglisod ang mga bag-ong gustong magpa-lisensya.
Hinuon miingon si Belleza nga nindot og tumong ang maong sistema ni PNP Chief Director General Alan Purisima aron mamenosan ang mga loose firearms.
Apan nabalaka si Belleza nga inay maayo ang ibunga niini posible pa hinuon modaghan ang mga loose firearms kay dili na mo-renew sa lisensya tungod sa kahasol sa sistema.
Gawas nga hasol dako pa gyud kaayo og gasto ang pag-adto sa kampo Crame. Matud pa niya nga dili consistent ang pamaagi sa kapolisan kay lahi-lahi og sistema nga gusto ang molingkod nga director general sa PNP. - /EIM (BANAT NEWS)