CEBU, Philippines - Ang mga tinun-an gamiton sa kapolisan aron pagtabang kanila nga madakpan ang mga banggiitan nga kriminal nga dugay na kaayo nila nga gipangita apan idlas kaayo dakpon.
Si Chief Inspector Enrique Belciña, hepe sa Police Community Relations sa Cebu City Police Office (CCPO), miadto sa mga tunghaan ug nanghatag sa mga tinun-an og bookmarks nga gituyo pagpahimo.
Ang bookmarks nga gipanghatag ni Belciña adunay mga hulagway sa napulo ka nag-una nga mga wanted persons ingon man ang ilang mga ngalan ug ang kaso nga ilang gikalambigitan.
Malaumon si Belciña nga pinaagi sa mao nga mga bookmarks nga gipanghatag sa mga tinun-an makatabang kini nga matultolan sa kapolisan kun asa magtago ang mga pinangita sa balaod. Matud ni Belciña, gawas nga kapahimuslan sa mga tinun-an ang mga bookmarks, makatabang usab kini sa kapolisan kun adunay makatug-an hain magtago ang mga wanted. (BANAT NEWS)