CEBU, Philippines - Duha ka lalaking nagdala og armas nga walay mga lisensiya nasikop sa kapolisan diha sa managlahing lugar sa Sugbo.
Si Jessie Mondejar, 30, taga sitio Timbocol, barangay Putat, lungsod sa Tuburan nasikop sa kapolisan nga nagpahigayon og checkpoint sa milabay’ng adlaw diha sa barangay Tajao, lungsod sa Pinamungajan.
Si Mondejar giingong sakay sa iyang motorsiklo dihang nabantayan sa mga polis nga nag-checkpoint pinangulohan ni Chief Inspector Roseller Paller nga nagbagal ang kilid.
Ang mga polis mihangyo kang Mondejar nga isaka ang sinina hinungdang nasakpan ang giluklok niyang kalibre .38 nga revolver nga dunay lima ka bala ug usa ka kabhang.
Ang suspetsado wala makapakita og mga dokumento sa pagdala niini hinungdan gisikop.
Sa laing bahin, si Ronald Carael, 32, taga sitio Kalubihan, barangay Talamban gidakop ni SPO4 Joel Suelo niadtong Huwebes sa buntag tungod sa paghupot niini og kalibre .38 nga revolver nga dunay tulo ka bala.
Si Carael wala makapakita og papeles paghupot sa maong armas. Ang duha ka suspetsado mag-atubang og kasong illegal possession of firearms. - /BDB (BANAT NEWS)