CEBU, Philippines - Gisalikway sa hukmanan ang gipangayo sa 16 ka pamilya nga kanhi nagpuyo sa Warwick-Barracks nga papugngan unta ang dakbayan sa Sugbo pagpapahawa kanila gikan sa gipuy-an nila nga merkado sa Barangay Ermita.
Matud ni Cebu City Legal Officer Jerone Castillo nga wala ihatag ni Regional Trial Court (RTC) Judge Gilbert Moises ang gipangayo nga Temporary Restraining Order (TRO) sa mga molupyo sa Warwick-Barracks.
Nakasabot si Judge Moises nga kadtong mga tinuod g’yud nga naninda sa Warwick-Barracks hatagan man sila og luna sa mga opisyal sa dakbayan sa Sugbo nga ilang kabalhinan pagpaninda diha sa palapdan nga Freedom Park market.
Ang nahimutangan sa dalan El Filibusterismo, ang karsada nga nag-uwang sa Freedom Park Market ug Warwick-Barracks isibog ug adto na mag-agi sa luna nga sakop na sa Warwick aron sa tumong nga modaku ang Freedom Park nga katindahan. (Rene U. Borromeo)
Balay naugdaw, naamong sa lamok
Duha ka tawo ang nakaangkon og mga paso sa ilang kalawasan dihang nasunog ang ilang balay didto sa Barili tungod sa pagsilaob sa daub nga gitumong unta aron pagbugaw sa mga lamok.
Ang mga nakaangkon og mga paso sa ilang kalawasan mao si Oliver Lascuña ug ang iyang 84-anyos nga amahan nga si Fidel Lascuña, pulos taga Barangay Balao, Barili.
Nakaangkon og mga paso ang amahan ug anak dihang naninguha sila pagpawong sa misilaob na nga kayo apan naugdaw g’yud ang ilang balay. Ang duha gidala sa Barili District Hospital aron katambalan sa ilang mga paso.
Si SFO4 Jesus Garcia sa Barili Fire Station, mitug-an nga si Fidel maoy nagdaub gamit ang mga bunot sa lubi ug ubang sagbot ilawom sa ilang balay aron molayas ang mga lamok. Matud pa nga mipahulay ang amahan ug anak apan mao na lay nabantayan nila nga misilaob na ang kayo nga dali kaayo nga midukot sa ilang panimalay. Tungod kay payag ra man ang nasunog, ang kabomberohan mibana-bana sa danyos mga mukabat lang og P15,000. (BANAT NEWS)