CEBU, Philippines - Si Lapu-Lapu City Police Office Director Sr. Supt. Rey Lyndon Lawas gikatakdang makigtagbo sa pangulo sa Bohol Provincial Police Office sa lalawigan sa Bohol aron magtinabangay sila pagsumpo sa illegal fishing sa kadagatan sa Lapu-Lapu ug Bohol.
Matud pa ni Lawas base sa nakuhang impormasyon sa mga sakop sa PNP Task Force Kalikasan o TFK ang mga mananagat gikan sa lungsod sa Getafe, Bohol nalambigit sa dynamite fishing sa Danajon Bank duol sa isla sa Caubian. Buot ni Lawas nga makigkita ni Sr. Supt. Dennis Agustin aron kahimoan og lakang sa pagsumpo ang ilegal nga panagat.
Matud pa ni Lawas kinahanglan nga joint effort sa duha ka habig ang pag-monitor sa mga illegal fishers. Gawas sa dynamite fishing ang TFK nakabantay usab nga dunay mga migamit og pino nga pukot sa pagpangisda nga gidili sa balaod tungod kay hasta gagmay’ng isda makuha. (BANAT NEWS)