CEBU, Philippines - Nadakpan sa kapolisan ang upat ka batan-ong lalaki sa akto nga namalit og shabu gikan sa wala hiilhing drug pusher didto sa dalan F. Ralota, Barangay Poblacion, dakbayan sa Danao lapas sa tungang gabii kaniadto’ng Martes.
Ang mga nadakpan mao sila si Joshua Roble, 19, Roldan Emmanuel Cazona, 19, Noel Jay Avelino Ermita, 20 nga pulos taga dalan F. Ralota, ug ang usa ka 16 anyos nga lalaki nga taga Barangay Sandayong Sur, dakbayan sa Danao.
Si SPO4 Arestio Espina sa Danao City police station miingon nga ang mga polis naniid sa illegal nga kalihokan sama sa pagpamuhat og armas, sugal nga hantak, masiao ug uban pa.
Matud ni Espina nga samtang nagpatrolya ang kapolisan ilang nasigpatan ang lima ka tawo nga nagtunol og kuwarta ngadto sa wala hiilhing lalaki ug gitunolan usab sila og pakete nga ilang gituohang shabu.
Si Espina miingon nga nakamatikod ang mga lalaki sa nagpadulong nga mga polis ug dali kaayo nga nakadagan ang duha ug ang upat nga nakalitan nga wala na makalihok sa ilang nahimutangan maoy nadakpan.
Gihimo karon sa kapolisan ang pakisusi gikan sa mga dinakpan aron mailhan kadtong kauban nila nga nakaeskapo. (/RUB)(BANAT NEWS)