CEBU, Philippines - Usa ka bana ang mipadakop sa iyang asawa ug kulokadidang nga iyang bilas human ang duha bag-ohay pang migawas gikan sa usa ka motel diha sa reclamation area sa barangay Centro, dakbayan sa Mandaue niadtong miaging adlaw. Arestado ang 31-anyos nga ginang ug ang 43-anyos niini nga bayaw, pulos taga barangay Tabok nga gidudahang iyang kabit diha mismo sa gate sa maong motel atol sa ilang pagpanggawas.
Ang bana uban sa mga polis kapin duha ka oras nga nagpaabot sa gawas samtang ang duha diha sa sud sa maong motel tungod kay wa mosugot ang gwardiya nga pasudlon ang bana ug ang mga polis aron arestuhon ang duha.
Ang 30-anyos nga bana matud pa daan nang nagduda nga dunay relasyon ang iyang asawa ug ang biyudong bana sa igsuon niini. Namatay na ang asawa sa biyudo ug sukad niadto nakabantay ang reklamante nga nagkasuod kini og maayo sa iyang asawa.
Matud pa ni PO1 Juliet Trogo sa Women’s Desk Section sa kapolisan sa Presinto 1 sa Mandaue City Police Office (MCPO) ang bana nagpakaaron-ingnong mo-duty nianang adlawa.
Apan diay wala kini molahos kay iyang gipanid-an ang lihok sa iyang asawa diha sa atbang sa ilang balay.
Matud pa nga milakaw ang ginang ug misakay og jeep ug nikanaog sa dalan Ouano Avenue sa reclamation area ug didto gi-pickup kini sa biyudo nga nagdala og sakyanan ug nanulod sa maong motel.
Tungod niini dali siyang midangop sa kapolisan aron unta dakpon sa akto ang gihimong pagluib kaniya sa iyang asawa apan nagmagahi ang gwardiya pagpasulod sa mga polis.
Matud pa ni PO1 Trogo nga ilang nahibaw-an nga short time ra ang pag-check in sa duha maong ila na lang sila gipaabot nga manggawas ug diha na gidakop. Ang duha gitanggong na karon sa detention cell alang sa pagpasaka og kasong concubinage ug adultery. (BANAT NEWS)