CEBU, Philippines - Gipusil patay sa wala pa mailhing lalaki nga nagmotor ang usa ka negosyanteng babaye atubangan mismo sa iyang balay diha sa sitio Baha-baha, barangay Poblacion sa lungsod sa Argao.
Ang biktima naila nga si Macelina Villafuerte, 40, molupyo sa nahisgotan nga lugar ug tigpatanto og kwarta. Samtang padayon pang gipangita ang mamumuno nga nagsakay og motorsiklo nga daling miikyas palayo sa dapit.
Base sa imbestigasyon sa kapolisan nga gipangulohan ni Insp. Alejandro Batobalonos samtang diha sa atubangan sa iyang balay ang biktima kalit kining gihunongan sa usa ka blue nga XRM nga motor ug kalit lang gipusil sa lalaki nga nag-helmet, nag-jacket og itom.
Naigo ang biktima sa likod nga bahin sa iyang ulo ug milapos ang bala sa iyang agtang nga maoy hinungdan sa iyang kamatayon.
Dali sab nga mibiya ang suspetsado sakay sa iyang motor ug wala gyud kini madakpi sa kapolisan. Ang biktima kasosyo sa negosyo sa gipatay nga konsehal sa lungsod sa Argao nga si Joaquin Banosong, 64, nga usa sab ka kanhi polis.
Padayon pa ang imbestigasyon sa kapolisan sa maong hitabo lakip na ang pagsubay sa motibo sa maong pagpatay.
Samtang, naangol ang usa ka negosyante og balas nga si Generoso Lipiten, 23, nga gilabay og bato sa ulo ug gipusil nila ni Aldren Areglo, Bebing Areglo, usa ka “Larry†ug lain pang usa nga wala mailhi sa miaging hapon sa sitio Chicos, Lower South Hills, barangay Tisa sa dakbayan sa Sugbo.
Ang biktima naghakot og balas dihang giatake sa mga suspetsado. Ang biktima gidala sa tambalanan samtang miikyas ang mga suspek. - /EIM (BANAT NEWS)