CEBU, Philippines - Patay ang usa ka lalaki human kini gipusil sa duha ka tawo didto sa Sitio Humayhumay, Brgy. Pajo, dakbayan sa Lapu-Lapu kagahapon sa kaadlawon.
Ang biktima mao si Fernando Sagarino, 26, residente sa maong dapit ug padung unta mopauli sa ila gikan sa balay sa iyang iyaan dihang gihunongan sa duha ka lalaking nagmotor ug ang angkas mipusil kaniya.
Si Sagarino nahiagum og samad pinusilan sa walang kilid hinungdan sa hinanaling kamatayon niini. Samtang dali usab nakasibat ang mga suspek human sa maong insidente.
Ang sitio Humayhumay sa Brgy. Pajo ug Gun-ob maoy usa ka dapit nga gihugpaan sa mga nalambigit sa problema sa illegal nga drugas sumala pa sa kapolisan. (BANAT NEWS)