CEBU, Philippines - Wala na kinahanglana pa nga magbutang og mga decorative lamp post diha sa mga lugar nga maagian sa mga delegado sa 2015 APEC Summit sa dakbayan sa Lapu-Lapu.
Si Hembler Mendoza, hepe sa Lapu-Lapu City Tourism ug si Mayor Paz Radaza atol sa ilang panagtagbo wala mosugyot butanga’g lamp post ang mga dalan paingon sa mga hotel nga puy-an sa mga delegado.
Kahinumduman nga sa milabay’ng mga tuig sa pagpahigayon sa ASEAN Summit nganhi sa Sugbo dunay mga local officials ang nangakiha tungod sa isyu sa overpricing sa lamp posts.
Matud pa sa duha dili nila buot masubli ang maong isyu hinungdan nga inay nga suga, mga buwak na lang ang ilang pang-panindot sa agian sa mga delegado, pagpintal sa mga center island ug pagpaayo sa mga gubaong dalan palibot sa isla sa Mactan. (BANAT NEWS)