CEBU, Philippines - Usa ka gatos ka mga balay sa mga informal settlers diha sa mga danger zones ug kadtong nasulod sa three-meter easement zones sa mga sapa sa Mandaue City ang gipaguba sa siyudad.
Si Tonypet Juanico, pangulo sa Housing Urban Development Office miingon nga ang maong mga balay nga gipaguba nahimutang sa daplin sa Butuanon.
Gawas pa niini, duna pay laing mga balay ang gikatakdang demolison ilabi na kadtong namuyo sa Mahiga Creek ug Tipolo Creek ug ang 33 ka pamilya sa barangay Ibabao-Estancia nga nagpuyo usab sa danger zone.
Ang mga nagpuyo sa barangay Cabancalan, Casuntingan, Maguikay, Paknaan ug lahos na sa barangay Umapad nga giagian sa Butuanon River maoy maapektahan sa maong demolisyon.
Si Cheryl Aller nga maoy presidente sa Ibabao Estancia Urban Poor Home Owners Association miingon nga gisuportahan nila ang mga programa nga gipatuman sa kagamhanan. Si Clemence Quiros nga maoy coordinator sa Philippine Commission on Urban Poor (PCUP) Region 7 namahayag nga kaakohan sa kagamhanan ang pagpahiluna sa mga maapektahang mga residente.
Ang siyudad sa Mandaue aduna nay giandam nga relocation site diha sa barangay Paknaan alang sa mga maapektahang molupyo.Duna kini kaugalingong dalan, linya sa kuryente, drainage system ug limpyong tubig. (BANAT NEWS)