CEBU, Philippines - Usa ka barko nga paingon sa Mindanao ang wala makadayon og lawig tungod sa pagkaguba sa makina niini pipila pa lang ka minutos gikan sa pagbiya sa Pier 5 sa Cebu City sa miaging gabii.
Sumala pa sa Coast Guard naguba ang ikaduhang auxiliary engine sa M/V Trans Asia 5 nga paingon unta sa dakbayan sa Cagayan de Oro.
Matud ni Philippine Coast Guard Central Visayas commander Commodore William Melad, ang maong barko dunay sakay nga 580 ka pasahero, 73 ka tripulante.
Ang report sa PCG nagkanayon nga alas-10 Miyerkules sa gabii migikan ang barko sa Pier 5 apan pag-abot na habig sa Shell island ug Ludo wharf duol sa South Road Properties (SRP) naguba ang makina niini. "On or about 10:40pm, auxiliary engine number 2 tripped off at vicinity between Shell Island and Ludo wharf. Master decided to drop anchor for safety, and after troubleshooting found out that auxiliary engine number 2 failed due to overheating," si Melad nagkanayon sa Banat News.
Duha ka minutos human mabantayi nga naguba ang makina misunod usab og kaguba ang makina nga nagdala sa pagpasaka ug paubos sa angkla nga gitawag og windlass.
Tungod niini, napugos ang mga tripulante sa pagbugto sa kadena sa angkla aron pagbalik sa pantalan aron masiguro ang kaluwasan sa mga pasahero niini.
Alas 11:40 na sa gabii hingpit nga nakadunggo og balik sa Pier 5 ang maong barko. Hinuon ang mga pasahero niini gibalhin na sa laing barko sa maong shipping lines nga padung usab sa Cagayan de Oro City kagabii ug ang uban gi-refund na lang ang pleti. (BANAT NEWS)