CEBU, Philippines - Kadtong mga biktima sa bagyo’ng Yolanda dinhi sa Kabisay-an nga wala pa kaayo makadawat og hinabang bugas-humay, gipaabot nga makapahimulos na g’yud tungod sa daghang bugas nga gidonar sa United States.
Si Philip Goldberg, ang ambassador sa Estados Unidos dinhi sa Pilipinas, maoy nangunay sa pagtugyan sa 1,500 ka metric tons nga mga bugas-humay aron kapahimuslan dayon sa mga biktima sa bagyo.
Matud ni Goldberg nga ang ilang nasud nagpakabana g’yud sa kahimtang sa daghang mga biktima sa bagyo nga hangtud karon wala pa gihapon makabangon pagbalik sa ilang kahimtang.
Dinhi sa Kabisay-an, daghan pa gihapon sa mga biktima sa bagyo’ng Yolanda, ilabi na ang mga mulopyo sa kalungsoran sa Camotes ang nagbagulbol kay matud pa wala kaayo moabot kanila ang mga hinabang.
Si Goldberg mitugyan sa mga bugas ngadto sa kadagkoan sa Department of Social Welfare and Development (DSWD) ug sa ilang mga higala sa World Food Program nga mitabang g’yud sa relief operations human g’yud sa bagyo kaniadtong Nobiyembre 8.
Kauban ni Goldberg nga mitugyan sa mga bugas mao si Gloria Steele, mission director sa United States Agency for International Development nga nagbase sa US Embassy sa Manila. Si DSWD-7 Regional Director Mercedita Jabagat nalipay kaayo sa dakung tabang sa Estados Unidos ug mipasalig nga iapud-apod dayon nila ang mao nga mga pagkaon sa mga biktima sa bagyo. (BANAT NEWS)