CEBU, Philippines - Giyam-iran lang ni Mayor Michael Rama ang sugyot sa kadagkoan sa Cebu Port Authority nga ang yuta duol sa karaang building sa Compania Maritima ibaylo kini sa CPA sa yuta sa dakbayan didto sa Block 27 sa North Reclamation Area.
“Wala sila kuyaffffi!!!,†matud sa mayor dihang gipangutana siya sa Banat News kun unsay iyang reaksyon sa sugyot ni CPA General Manager Edmund Tan nga magbayloay og yuta ang CPA ug ang dakbayan sa Sugbo.
Dugay ra nga ang CPA mokoral unta sa kapin sa duha ka hektareya nga yuta duol sa Compania Maritima, atbang ra sa City Hall, kay nagtinguha sila nga ilang gamiton o kaha ibaligya.
Apan ang koral nga gitukod sa CPA nga walay permiso sa Office of the Building Officials (OBO) gipabungkag ni Mayor Rama. Ang mga opisyal sa CPA sayo pa misupak nga parkingan og mga sakyanan ang mao nga hawan duol sa Compania Maritima. Si Mayor Rama miingon nga ipagamit niya isip parking area ang mao nga dapit sanglit daghang mga sakyanan nga dili na makaparking sa Plaza Sugbo, duol sa simbahan sa Basilica.
Si Atty. Jade Ponce nga maoy pangulo sa Land Management Council sa dakbayan mitataw nga walay papel ang CPA nga makigbayloay og yuta sa dakbayan kay dili ila ang yuta tupad sa Compania Maritima.
Ang mao nga yuta kabahin kini sa gi-reclaim kaniadto sa Department of Public Works and Highways (DPWH) dihang giugmad pa ang South Coastal Road. Ang dagat kanhi nga dunggoanan sa mga barko sa George and Peter Lines nahimo na nga yuta ug mao kini ang giangkon sa CPA nga ila. (BANAT NEWS)