CEBU, Philippines - Illegal nga drugas nga mokabat ngadto sa P50,000 ug nagkadaiyang gamit sa pagpanghimo og armas nga mobalor sa P100,000 ang nakuha sa operatiba sa Provincial Anti-Illegal Drugs Special Operation Task Group (PAIDSOTG) sa ilahang operasyon sa Barangay Tuburan Sur, Danao City sa miaging gabii.
Ang PAIDSOTG misikop nila ni Ronilo “Tata†Capuno, 46,ug sa live-in partner niini nga si Gloria Saturos, 56, nga usa ka midwife sa Danao City Health, sa ilang gipuy-an. Nakuha gikan nila ang upat ka mga medium packs sa shabu, budol money nga adunay P500 genuine bill; drug paraphernalia; mga wala mahuman nga 9mm pistol ug 9mm revolver; aluminum pistol frame; suppressor; magazines sa KG9 pistol, .45 pistol, 9mm pistol ug .22 long rifle; nagkadaiyang pistol grips; mga bala sa .45 pistol, .38 revolver, .380 revolver, .357 revolver, .40 revolver, M16 rifle, M14 rifle, ug 9mm pistol; mga parte sa .45 pistol; mga empty shells sa .38 revolver ug .45 pistol; bench drill; portable electric drill; assorted metal pipes; metal saws; wrench; hammer; drill bits; ug calliper.
Ang shabu gidala na ngadto sa Philippine National Police Crime Laboratory-7 sa Camp Sotero Cabahug, Cebu City alang sa chemical analysis.
Si SPO1 Reynaldo Solante, team leader, mibutyag nga anaa na sa ilang target list si Capuno samtang si Saturos anaa sa watch list sa Danao City Police Station.
Butyag pa ni Solante nga si Capuno personal nga nakigtransaksyon kanila diha mismo sa shop niini samtang si Saturos maoy kahera. Gidala pa usab ni Capuno ang poseur buyer sa kwarto diin gihipos ang mga parte sa armas.
Kasong kalapasan sa RA 9165 o Dangerous Drugs Act of 2002 ug RA 10591 o Comprehensive Law on Firearms and Ammunition Regulation Act ang ipasaka batok sa mga dinakpan. (BANAT NEWS)