CEBU, Philippines - Usa ka kalabira nga gituohang iya sa usa ka 6-anyos nga bata napalgan sa mga batang nagduwa sa kalibonan sa Sitio Bakilid, Barangay Quiot, dakbayan sa Sugbo kagahapon sa buntag.
Base sa pamahayag ni SPO1 Ruth Bongo-Violango nga nagduwa-duwa sa kalibonan ang tulo ka bata dihang ilang nabantayan ang usa ka kalabera hinungdan nga nangayo gilayon kini og tabang.
Si Violango miingon nga migimaw ang ulo ug duha ka gusok sa kalabera gikan sa yuta maong ila kining gikubkob.
Ang kalabira gipahiling na sa PNP Crime Laboratory Service 7 aron pagtino kung babaye o lalaki ba kini.
Apan usa ka Roque Medalla, molupyo sa maong lugar nga nakakita sa tsinelas ug sinina nga gisul-ob diha sa maong kalabira miingon nga ang iya kadtong anak nga 6-anyos nga si Mariflor nga na-missing sukad pa niadtong Oktubre 6 sa miaging tuig.
Dugang ni Violango nga kataposan nakit-an ang maong bata nga mikuyog sa usa ka Allan Gimonggala nga ilang silingan.
Gipa-blotter sa mga ginikanan ang maong hitabo ug susihon karon ni Violango kung napasakaan ba og kasong kidnapping si Gimonggala kinsa wa na mopakita sa ilang lugar. (BANAT NEWS)