CEBU, Philippines - Mga tanod nga mag-atubang og kaso nga naglambigit sa pagpahigayon nila sa ilang trabaho diha sa ilang barangay ang pahatagan ni Mayor Johnny De los Reyes og abogado.
Gawas sa legal assistance pahatagan usab sila og PhilHealth insurance card aron kung panahon nga moadto sila sa tambalanan o ba kaha ang sakop sa ilang pamilya nga magpatambal maatiman dayon kini.
Ang mayor mibuhi sa maong saad human nga si Kongresista Samuel Pagdilao sa Anti-Crime and Terrorism thru Community Involvement and Support (ACT-CIS) partylist misaad sa pagpatukod og multi-purpose building alang sa mga barangay tanod sa dakbayan sa Talisay.
Ang mayor mipasalamat sa kongresista tungod kay giapil sa iyang proyekto ang mga tanod sa Talisay.
Ang mayor miuyon sa gipamulong sa kongresista nga ang mga tanod daku kini og tabang sa pagmentenar sa kahusay ug kalinaw sa lugar.
Dugang sa mayor nga ang mga tanod nahimutang sa risgo ang ilang kaugalingon sa pagpahigayon sa ilang trabaho ug angayan lang usab nga hatagan kini og tabang ug suporta. (BANAT NEWS)