CEBU, Philippines - Ang kadagkoan sa Cebu City Traffic Operations Management miawhag sa mga traffic enforcers nga sitahon ug dakpon ang mga tawo nga magsul-ob og T-shirts nga gimarkahan og CITOM bisan og dili sila mga sakop.
Si Joy Tumulak, CITOM operations chief, miingon nga kinahanglang protehean sa mga traffic enforcers ang ilang kadungganan kay adunay mga tawo nga magsul-ob og T-shirt nga may marka nga CITOM unya manulis.
Usa ka babaye nga nagbarog didto sa dalan Cabreros, Barangay Basak-San Nicolas kalit lang gihunongan sa duha ka tawo nga nagsakay og motorsiklo ug gitionan og armas.
Gikuha sa duha ka tulisan ang iyang selpon dayong pasirit og padagan paingon sa Barangay Inayawan. Nakita sa babaye nga ang gisul-ob nga T-shirt sa tulisan adunay marka nga CITOM.
Gimandoan usab ni Tumulak ang iyang mga traffic enforcers nga sitahon ang mga motorista, ilabi na ang mga tag-iya’g motorsiklo, nga nagpapilit og CITOM sticker sa ilang sakyanan.
Ang ubang mga tag-iya’g sakyanan nagbutang og sticker sa CITOM ug LTO sa ilang mga motor ug kotse aron magduha-duha ang mga manakop sa pagsita kanila. (BANAT NEWS)