CEBU, Philippines - Dakpon ug isyuhan og Temporary Operator’s Permit (TOP) ang tanang drayber og sakyanan apil ang delivery truck sa mga kontraktor sa Department of Public Works and Highways (DPWH)-7 nga mo-parking daplin sa karsada nga makapasamot sa kahuot sa mga sakyanan.
Mao kini ang gisaad ni Edwin Ermac, operations chief sa Traffic Enforcement Agency of Mandaue (TEAM) atol sa press conference niadtong miaging adlaw nga nagpahibalo sa pagsugod na sa daghang proyekto sa DPWH nga pagsemento sa mga karsada sa Mandaue.
Ang mga representante sa lainlaing kontraktor sa pito ka road concreting projects sa Mandaue naminaw sa pagsulti sa opisyal sa TEAM nga estrikto sila nga mopatuman sa balaod aron dili mosamot ang problema sa trapiko. Ang proyekto pagsemento sa pito ka karsada sa Mandaue gikabalak-an nga makamugna og problema sa mga motorista ilabi na nga gibana-bana nga molanat pa kini og usa ka tuig usa mahuman.
Matud pa ni Ermac nga ang delivery truck sa matag kontraktor human sa pagdiskarga o pagkarga sa lugar nga gihunongan kinahanglan nga mobiya dayon aron dili nila sakmiton ang lisensya sa drayber.
Si Ermac mipahibalo nga modistino ang TEAM og mga traffic enforcer sa mga karsada nga sementohon sa DPWH aron motabang nga dili kaayo magkaguliyang ang dagan sa mga sakyanan.
Tambag ni Ermac sa mga trabahante ug mga tinun-an nga mogikan sila pagsayo sa ilang panimalay aron kalikayan nga malangan sila pagtambong sa trabaho o pagsulod sa ilang klase.
Kadtong adunay mga pribadong sakyanan gitambagan ni Ermac nga planohon pag-ayo ang ilang mga agian nga karsada aron dili sila matanggong og pipila ka oras sa gisemento nga mga karsada.
Ang mga pribado nga sakyanan gidid-an usab nga moparking daplin sa karsada sa mga dapit nga adunay nagpadayong pagsemento.
Gawas sa pagsemento sa karsada, idungan usab sa DPWH ang pag-ilis sa mga gagmay nga imbornal sa mga karsada nasyonal sa Mandaue.
Si Engineer Renult Ricardo, ang assistant district engineer sa DPWH, miila sa mga karsada nga ilisan nila og dagko ang mga imbornal nga mao ang Hernan Cortes Avenue sa Barangay Subangdaku, A.S. Fortuna sa Barangay Bakilid , dalan Plaridel sa Barangay Alang-Alang ug dalan M.L. Quezon sa Barangay Maguikay.
Ayuhon usab sa DPWH ang causeway sa Ouano Avenue ug palapdan ang Canduman North Road ayuhon ang flyover sa Barangay Maguikay.
Matud ni Engineer Ricardo nga nagkadungan ang pag-ilis sa mga imbornal ug ang pagsemento sa mga karsada kay gigahinan na sa DPWH og P400 milyones.
Kini kabahin sa pagpangandam sa kagamhanan sa nagsingabot nga Asian Pacific Economic Cooperation (APEC) congress nga gikatadang pagahimoon sa Sugbo sunod tuig. (BANAT NEWS)