CEBU, Philippines - Maglisod na unya og operate ang mga priso nga gidudahang mga drug lords nga natanggong na sa prisohan kun mahingpit na ang ordinansang magdili na ug mosilot niadtong masakpang nagtinil og cellphones sud sa prisohan sa Mandaue City Jail.
Gihangop sa mga sakop sa Bureau of Jail Management and Penology (BJMP) ug kapolisan sa Mandaue City Police Office (MCPO) ang ordinansahon nga mopahamtang na unya og multa nga P5,000 sa mga prisong dunay cellphone ug pamultahon usab og samang kantidad ang bisitang maoy mohatag niini ngadto sa priso.
Ang maong ordinansahon nga gipangamahanan ni Konsehal Demetrio Cortes Jr., kadtong mga bisita nga dunay cellphone kinahanglan mo-deposito dayon niini diha pa lang sa pultahan sa di pa mosulod sa MCJ. Si Chief Inspector Gil Inopia nga maoy jail warden sa Mandaue City Jail miingon nga kaniadto pa gidili sa mga prisohan ang mga cellphones, apan wala pa gyuy ordinansa nga nagdili niini. Ang ikaduhang ordinansahon mao ang giduso ni Konsehal Emmarie Lollipop Ouano-Dizon nga nagtugot sa mayor pagpagawas og salapi nga ganti ni bisan kinsa nga makahatag og kasayuran nga moresulta sa pagkasikop sa mga pinangitang kriminal sa dakbayan. Ang maong ordinansahon usab buot nga mohatag og ganti niadtong mga impormante nga mosumbong kabahin sa mga illegal nga kalihokan sa ilang palibot nga moresulta sa pagkasikop sa mga kriminal. Si Mandaue City Police Office (MCPO) Director Senior Superintendent Petronile Baldebrin mihangop sa maong ordinansahon.
Nasayran nga dunay mga kaso sa mga nangadakpang drug pushers sa Metro Cebu ang mitug-an nga ang ilang suppliers anaa magbase sud sa mga prisohan diin sila mapriso.
Gipaagi lang sa text o tawag sa cellphone ang pag-order niini ug kadtong priso nga druglord mopahibalo lang sa mga sakop diha sa gawas sa paghatud sa gipang-order nga drugas sa tawong (sagad mga street pushers) gustong mopalit niini. (BANAT NEWS)