CEBU, Philippines - Gibana-bana nga dul-an sa tunga sa milyon ka pesos nga kantidad sa mga isda nga gikan sa Zamboanga gisakmit sa mga sakop sa Cebu City Bantay Dagat task force kay namatud-an nga kuha kini sa dinamita.
Matud ni Koronel Ranulfo Sebusa nga maoy pangulo sa task force nga walay miangkong tag-iya sa mao nga mga isda dihang gisakmit nila kini didto sa Pier 2 human gidiskarga sa barko sa George & Peter Lines.
Ang lainlaing matang sa mga isda nga nagay-ot ang lawas, ilabi na ang tiyan tungod sa impak sa buto, gisulod og tulo ka dagko nga mga kahon.
Gipasabot ni Sebusa nga ang pagsakmit nila sa mao nga mga isda kabahin sa pagpatuman nila og “market denial†aron dili ikabaligya sa kamerkadohan ang mga isda nga kuha sa illegal nga paagi.
Ang mao nga mga isda gipanghatag sa Bantay Dagat ngadto sa lainlaing charitable institutions dinhi sa dakbayan pinasubay sa ordinansa. Gipahimangnoan ni Sebusa ang mga negosyante og isda nga dili gayud sila motumod og mga isda dinhi sa Sugbo kun kini kuha sa illegal nga paagi aron dili sila makasinati og pagka-alkanse.(BANAT NEWS)