CEBU, Philippines - Nasikop sa mga molupyo ang usa ka gikatahapang kawatan og sakyanan human kini nasulod sa dapit nga wala na’y kaikyasan didto sa Deca Homes Subdivision, Phase I, sa Barangay Tungkil, Minglanilla sa miaging gabii.
Ang nadakpan mao si Ric Jhon Flores, 19, taga Sitio Bato, Barangay Ermita, dakbayan sa Sugbo nga giingong mikawat unta sa motorsiklo ni Jeovane Estiola, molupyo sa nahisgutang subdivision.
Si PO2 Nikki Carlo Plarisan miingon nga nakadawat sila og tawag sa telepono nga dunay gikawatan og motor sa ilang subdivision apan pag-adto nila nadakpan na ang suspek.
Nasakmit pagbalik ang motorsiklo sa biktima. Ang suspek miangkon atubangan sa kapolisan nga siya ang mikawat unta sa motorsiklo ni Estiola.
Sa follow-up operation nga gipahigayon sa kapolisan sa Minglanilla ug mga sakop sa Carbon Police Station, nasakmit pa gayud sa kapolisan ang laing usa ka Yamaha MIO nga motorsiklo.
Ang mao nga motor didto masakmit sa balay nga gibaligyaan sa suspek sa maong motor nga iyang kinawat.
Matud ni PO2 Plarizan nga ang dinakpan nga si Flores gipasakaan nila og kaso nga carnapping didto sa fiskaliya. (/RUB)(BANAT NEWS)