CEBU, Philippines - Giawhag sa mga opisyal sa dakbayan sa Lapu-Lapu nga motahan na sa iyang kaugalingon ang responsable sa pagpasipala sa kinaiyahan ilawom sa Kontiki Wall sa Brgy. Maribago sa dili pa kini ilhon sa nagpadayong imbestigasyon.
Kini maoy panawagan atol sa press conference kagahapon nga gihimo nila ni city legal officer Yuri Binluan, Community Environment and Natural Resources Office Chief, Engr. Rodrigo Tagaan, Tourism Officer Hembler Mendoza ug Task Force Kalikasan Coordinator Andy Berame.
Ang maong mga opisyal mipadayag nga gihimo na nila ang mga lakang sa pag-ila sa usa ka "RICHIE" nga maoy ngalan nga gikulit sa usa ka table coral ilawom sa Kontiki Wall.
Matud pa ni Berame usa ka professional diver ang mihimo sa maong salaud gumikan sa giladmon nga 28 ka metros diin mahimutang ang maong markang "RICHIE" nga dili mahimo sa usa ka bag-ong nakat-on og diving nga kutob lamang sa 18 ka metros ang maabot.
Gumikan niini tanang mga logbook sa mga diveshops susihon kung kinsa si "RICHIE" aron mailhan kini ug mataral sa hukmanan gumikan sa kalapasan sa Republic Act 8550 o Philippine Fisheries Code of 1998 gumikan sa paguba niya sa kinaiyahan ilawom sa kadagatan.
Matud pa ni Binluan mas maayong motahan na lang ngadto kanila kung kinsa si RICHIE aron mas minus ang iyang silot nga maangkon ug lahi ang silot kung mapasakaan kini og kaso ngadto sa korte nga adunay silot nga duha ngadto sa 10 ka tuig nga pagkabilango ug multa nga balor 100 mil ka pesos pataas.
Gusto ni Binluan nga matudloan og leksyon ug madisiplina ang maong tawo aron di kini sundon sa uban.
Kahinumduman nga nadiskobrehan sa TFK nga dunay dakong ngan nga gikulit ilawom sa Kontiki Wall sa Maribago, ang maong dapit usa sa mga popular nga dive spot tungod sa kadaghan sa mga isda ug uban pang matang sa marine life nga makita sa maong dapit. (BANAT NEWS)