CEBU, Philippines - Usa ka lola nga nadagma ug nalumos sa hunasan sa sitio Dakong Balas, barangay Casay sa lungsod sa Dalaguete.
Ang biktima naila nga si Maxima Tuadles, 71, molupyo sa nahisgotan nga lugar. Base sa imbestigasyon sa kapolisan nga usa ka saksi ang nakakita kang Maxima nga nanginhas kini sa dagat sa sayong kabuntagon.
Apan nadagma kini sa dagat ug nakulob apan nahibulong si Felipe Zamora,Jr. nga nakakita kaniya nga wala kini mobarog og balik maong giluwas niya kini ug gidala sa Julio Cardinal Rosales Hospital apan gideklarar na kini nga patay na.
Mirekomendar ang kapolisan sa pamilya sa biktima nga ipa-autopsy ang lawas apan gibalibaran sila tungod kay nagtuo silang aksidente ra gyud ang nahitabo.(Bryner Diaz/EIM)
Pito ka buwan’g puya nakuykoyan
Usa ka pito ka buwang puya ang nakawtan sa usa ka lumolupyo sa purok Chicos sa barangay Labogon, dakbayan sa Mandaue kagahapon sa buntag.
Ang nakakawot mao si Alyn Ferrer, 40, nagpuyo sa maong dapit kinsa mitug-an ngadto kang PO2 Richard Ares sa kapolisan sa Presinto 3 sa Mandaue City Police Office (MCPO) nga alas- 6 pasado sa miaging gabii iyang naagian ang usa ka wala hiilhing babaye nga nagkawot.
Matud pa ni Ferrer gipangutana niini ang maong babaye kung nag-unsa kini sa lugar ug gitubag lang siya nga ilubong niini ang namatay niyang iring.
Apan nianang pagkagabii, mitug-an si Ferrer kang Ares nga wa siya makatulog tungod kay nagduda gyud siya sa lihok sa maong babaye.
Nianang pagkabuntag, giadto niya ang lugar ug gikuykoy pagbalik ang lungag ug diha niya nadiskubrehan nga puya nga babaye nga gibanabanang pito ka buwan ang gilubong.
Ang mga barangay tanod sa barangay Labogon nga gipahibalo ni Ferrer mao usab ang nagpahibalo ngadto sa kapolisan. Gisubay na karon sa barangay kung si kinsa ang posibleng inahan sa maong puya.
Ang patay nga puya gitugyan na sa buhatan sa city health nga mao na usab ang nagpalubong niini. (BANAT NEWS)