CEBU, Philippines - Gitun-an karon ang sugyot nga butangan og special gadget ang mga bus ug cargo truck aron ang mga drayber dili makapatuyang pagpakusog pagpadagan sa ilang sakyanan.
Si Regional Direktor Ahmed Cuizon sa Land Transportation Franchising and Regulatory Board (LTFRB) mipasabot nga daghan sa mga aksidente sa kadalanan nahitabo tungod sa abuso pagpadagan. Daghan na ang nangamatay tungod sa lainlaing aksidente sa kadalanan nga nahitabo kay naghinobra ang pagpakusog sa pagpadagan sa mga drayber, ilabi na kun maglumbaanay nga makauna sa pasahero.
Matud ni Cuizon nga duha ka matang sa gadget ang gisugyot aron magsilbi nga kahimanan pagpaniid sa mga drayber kabahin sa ilang pagpadagan sa mga sakyanan.
Si Cuizon miingon nga ang duha ka gadget mao ang speed limiter nga motingog kun subra na ang gikusgon sa dagan sa sakyanan ug ang Global Positioning System (GPS) tracker.
Kun ang sugyot hingpit na nga mauyonan didto sa Department of Transportation and Communications (DOTC) diin sakop niini sa LTFRB, iapil na kini sa mga rekisitos panahon sa renewal sa prangkisa. Gipasabot ni Cuizon nga ang matang sa mga gadgets nga gilaraw nga ibutang sa mga bus ug cargo truck, susihon kanunay kun wala ba kini maguba panahon sa pag-renew sa ilang prangkisa.
Si Cuizon miingon nga lakip karon sa gisusi kun pila ang kantidad sa matag gadget apil ang pagpataud niini sanglit dugang man kini nga galastohan sa mga operator.
Matud ni Cuizon nga ilang dapiton ang supplier sa gikinahanglang gadgets aron mohimo og demonstration sa iyang produkto uban sa mga tag-iya og bus ug cargo truck sa Sugbo.
Ang kapolisan hinoon naglaraw usab nga mopasakay sila og mga polis sa mga mobiyahe nga bus sa lainlaing kalungsoran aron nga mabadlong kun sila moabuso sa pagpadagan.
Gipasabot ni Cuizon nga ang “speedo limiter†maoy mopahinumdom sa mga drayber kun kusog na ang ilang pagpadagan. Motingog kini kun maghinubra na ang dagan sa gitugot nga gikusgon. Ang gadgets nga GPS, kun itaud sa mga bus ug cargo truck, maoy matang sa device nga magamit aron masayran usab ang gikusgon sa pagpadagan kay masuta man kun asa na kini mahimutang.
Si Cuizon miingon nga ang pagbutang og gadgets sa mga bus ug cargo truck mahingpit ang pagpatuman kun makita sa mga sakop sa technical working group nga usa kini ka mapuslanon. (BANAT NEWS)