CEBU, Philippines - Gikatakdang mo-file og petition for certiorari sa Korte ang mga residente sa sitio San Miguel, Barangay Apas aron pugngan ang demolisyon karong Marso 4.
Ang kapitan sa Apas nga si Ramil Ayuman nagkanayon nga mo-file sab sila og petisyon sa korte nga resolbahon una niini ang pipila ka mga butang una pa ang demolisyon sa kabalayan sa lot number 942 ug 947.
“Ila usa unta iresolba kung kinsa g’yuy tag-iya anang luna ug kung nganong naa’y mga naapil sa lista sa ejectment bisa’g di sila apil sa nagpuyo sa maong lote,†sumala pa ni Ayuman.
Si Ayuman, kauban ang mga abogado sa kapin sa 150 ka-pamilya nga maapektahan unya sa demolisyon nagpanon sa pre-demolition conference sa opisina sa Presidential Commision for the Urban Poor (PCUP).
Si Ayuman nagkanayon nga igo lang gi-briefing ang mga residente sa guidelines sa mahitabo atol sa demolisyon.
Ang abogado sa mga residente nga si Atty. Feliciano Payot nangangkon nga duna sila’y bag-ong nakaplagan nga ebidensya nga magpamatuod nga ang yuta gipanag-iya g’yud sa Kapitolyo ug dili kang Aletha Suico-Magat.
Mao kini ang sertipiko gikan sa Friar Lands Sale Certificate Register nga nagpakita nga ang yuta gi-issue sa Probinsya sa Sugbo kaniadtong Septiyembre 3, 1936.
Gikwestyon usab ni Payot ang jurisdiction sa Municipal Trial Court in Cities sa maong kaso ug midugang pa nga sayop ang legal remedy niini.
“It should not be ejectment, but only recovery of possession kay 30 years na gud sila diha sa luna,†matud pa sa abogado.
Apan usa sa abogado ni Magat na si Atty. Russel Pernites nagkanayon nga duna na’y desisyon gikan sa Korte Suprema nga ang maong mga luna i-reconvey o ibalik sa tag-iya kay nabayran na ang mortgage niini, ug ang giilang tag-iya mao ang walo ka anak ni Santiago Suico, ang giingong orihinal nga tag-iya.
Gipakita ni Pernites ang dokumento sa reconveyance nga pinetsahan og Disyembre 2011.
Ang kampo ni Magat nakakuha na og Writ of Demolition gikan sa korte ug kun dili makakuha og temporary restraining order ang mga residente, ipadayon ang demolisyon alas 8:30 sa buntag karong Marso 4. (/EIM)(BANAT NEWS)