CEBU, Philippines - Ang pari nga nag-maestro sa Talisay City College nangayo’g pasaylo sa 16-anyos nga tinun-an nga iyang gipakauwawan sulod sa classroom. Si Padre Judito Rosende miadto g’yud sa balay sa bata ug nangayo’g pasaylo dayon mihangyo nga mobalik na sa pagtungha ang mao nga tinun-an nga nakahukom na unta nga moundang pag-eskwela.
Ang presidente sa TCC nga si Richel Bacaltos miingon nga human nabaniog sa balita ang pasangil batok kang Padre Rosende wala na motungha sa iyang klase ang tinun-an.
Matud ni Bacaltos nga gipatawag niya si Rosende ug misulti kini ngadto kaniya nga nangita siya sa pinuy-anan sa dalagita kay nangayo siya og pasaylo. Si Rosende giingong mipakauwaw sa menor de-edad pinaagi sa pagsulti og dili maayong pulong atubangan sa mga classmate sa bata.
Giangkon sa pari nga nadala lang siya sa iyang kasuko tungod kay ang dalagita nagbugal-bugal kaniya.
Si Bacaltos nagkanayon nga nagpinasayloay na ang menor ug si Rosende niadtong milabay’ng semana.
Ang tinun-an gipatawag usab ni Bacaltos sa iyang buhatan human mitumaw ang report apan wala kini mopakita.
Kahinumduman usab nga sa student evaluation ang mga tinun-an mosaway kang Padre Rosende kinsa giingong sakit og sinultihan kanila diha sa iyang klase. Dugang ni Bacaltos nga ang academic council na sa eskwelahan maoy mohukom kang Rosende alang sa iyang status human sa insidente. (/RUB)(BANAT NEWS)