CEBU, Philippines - Dunay laing tabang nga madawat ang kagamhanan sa dakbayan sa Sugbo sa giplano niining pagtukod og bag-ong Cebu City Medical Center.
Kini human ang Ambassador sa nasud sa Israel nga si Menashe Bar-on, sa iyang pakigtagbo kang Mayor Michael Rama kagahapon, nipadayag kini nga gustong motabang ang iyang nasud pagpatukod sa maong ospital.
Si Rama miasoy nga iya gilayon gisultian si Bar-on sa kahimtang sa ospital ug gikuyogan kini aron personal nga makita ang sitwasyon sa mga pasyente nga anaa karon mag-estar sa Fire Department building. Gipakita usab niya kang Mayor Rama ang ilang risk reduction and management expertise base sa ilang kasinatian sa mga pag-atake sa mga terorista.
Si Rama nagkanayon nga iyang gitahasan si Konsehal Dave Tumulak ug Protocol Officer Leslie Ann Reyes sa pag-check sa mga risk reduction and management events sa maong ambassador aron matambungan kini sa taga-Cebu City Hall.
Giawhag usab ni Rama ang Konseho nga paspasan ang paghikay sa dokumento aron masugdan na ang pagtukod sa bag-ong CCMC.
Giklaro ni Rama nga bisan pa’g dinalian ang pagtukod sa ospital, kinahanglang mag-agi gyud gihapon kini sa hustong proseso ug kompleto ang mga dokumento. (Niña S. Abenoja/EIM)
Gibinaklid, gibulit og dunggab
Usa ka lalaki ang napalgang patay na nga gibinaklid ug nabulit og samad dinunggaban ang kalawasan didto sa Barangay Anapog, Catmon kaniadtong Miyerkules sa buntag.
Si Benjamin Saludar, 50, nga taga lungsod sa Tuburan apan maoy caretaker sa usa ka luna sa yuta sa maong dapit, nakit-an na lang nga wala nay kinabuhi 200 metros ang gilay-on gikan sa iyang pinuy-anan.
Si Sr. Insp. Jose Rovic Villarin, hepe sa Catmon Police Station, mibutyag nga personal grudge ang ilang gitutukan nga motibo sa maong pagpatay ug posibleng dili lang usa ka tawo ang mihimo niini. Si Villarin midugang nga posibleng nakasukol pa ang biktima human nila nakita nga aduna pay lama sa dugo sulod sa iyang balay. Nagtuo ang kapolisan nga didto kini gipatay sud sa balay ug gilabay na lang ang lawas sa kawayanan. Matud ni Villarin nga base lang sa lama sa dugo sulod sa balay nagtimailhan nga dunay “commotion†pero giyayungan ni siya paingon sa kawayanan. Dugang ni Villarin nga adunay kontra si Saludar sa mga silingang luna.
Nasayran nga dunay masaag nga mga binuhing hayop sa luna nga gibantayan sa biktima ug pirme kining magkalalis sa mga silingan kay masuko nga pangan-on ang iyang mga pananom. (BANAT NEWS)