CEBU, Philippines - Tulo ang patay, lakip na ang usa ka 10- anyos nga bata, ug laing 10 ang nangaangol human ang gisakyan nila nga van-for-hire midasmag ngadto sa Fuzo dump truck didto sa national highway sa Barangay Talaga, Argao sayo sa buntag kagahapon.
Ang mga namatay pulos mga Persons with Disabilities (PWDs) nga paingon unta sa Chong Hua Hospital alang sa ilang checkup nga gi-sponsor sa usa ka Norwegian non-governmental organization.
Patay sila si Guillerma Belandres, 25, taga Barangay Banhigan, Dalaguete; si Rosalinda Laurente, 42, ug si Diether Caracol, 10, pareho nga taga Barangay Canlumpang, Oslob.
Sila namatay paglabay sa usa ka oras samtang gitabang sa Isidro Kintanar Memorial Hospital sa Argao.
Nangaangol usab sila si Arieta Caracol, 42; Dan Luster Cala, 18; Luis Caracol, 31; ug Aloisa Caracol, 14, pulos taga Barangay Canlumpang, Oslob; Stephanie Belandres, 17; Jessica Celerio, 31; Abegail Entice, 3; ug Jose Ramil Entice, 36, drayber sa Isuzu van ug amahan ni Abegail, pulos taga Barangay Banhigan, Dalaguete; Lorna Minao, 46; ug Ryan Minao, 12, pulos taga Barangay Poblacion, Dalaguete.
Dali silang gidala sa Vicente Sotto Memorial Medical Center sa Cebu City.
Matud pa nga ang Isuzu van (TQC 306) gimaneho ni Jose Ramil paingon kini sa dakbayan sa Sugbo gikan sa Oslob samtang ang dump truck (KED 200) nga gimaneho ni Mandy Estares, 38, taga dakbayan sa Naga paingon usab sa Dalaguete.
Sumala pa sa drayber nga si Estares nga paingon unta sila magkarga og coal minerals kuyog ang truck boy niya nga si Folino Alferez. Si Estares nakaangkon usab og ginagmay nga bun-og ug samad sa walang batiis.
Si Renante Manitis, 41, taga Barangay Talaga, Argao, mibutyag nga kusog ang uwan niadtong higayona ug iyang nakita nga kusog ang dagan sa van nga mi-overtake sa traysikol nga nagpabulkit pipila ka metros ang gilay-on gikan sa nahitaboan.
“Dunay traysikol nga nagpabulkit sa unahan unya mi-overtake nang van pero malas kay wala na kabawi,†matud ni Manitis. Gumikan kay dangog ug kurbadahon ang karsada nawagtangan og kontrol ang drayber sa van ug nadasmag sa gikasugat nga dump truck.
Matud ni Estares nga anaa na g’yud siya sa pidpid sa dalan ug nag-aginod dihang kalit nga nidasmag sa iyang atubangan ang van.
“Pidpid na kaayo ko sa daplin, nag-aginod ko kay kahibawo ko nga dangog ang agianan unya nagpadung na nako ang van…siya mismo na ang mibangga,†butyag ni Estares.
Gikompirmar usab ni Manitis ang pamahayag ni Estares.
Ang nakalas nga si Diether usa lang sa pipila ka bata nga mahatagan unta og kaayuhan sa sakit sa mata uban sa iyang igsuon nga si Aloisa kinsa naangol usab.
Sila mga beneficiaries sa Norwegian nga miabot sa ilang lungsod sa miaging tuig aron sa pagtabang kanila.
Si Insp. Alejandro Batobalonos, Argao police chief, mibutyag nga pasakaan nilag si Estares og reckless imprudence resulting in multiple homicide and physical injuries apan depende na kini sa korte kung i-dismiss ang maong kaso. (BANAT NEWS)