CEBU, Philippines - Giawhag ni Mayor Michael Rama ang katawhan nga dili dayon matarantar kabahin sa gidungog nga meningococcemia ang sakit nga namatyan sa bata didto sa Barangay Pulangbato, dakbayan sa Sugbo kaniadtong Sabado.
Ang mayor miingon nga ang mao nga report susihon pa sa mga tinugyanan sa Department of Health (DOH) ug sa Cebu City Health department.
Ang DOH-7 miawhag ni City Health Officer Daisy Villa sa paghimo og imbestigasyon aron pagsuta unsa g’yud ang namatyan sa usa ka tuig nga bata didto sa barangay Pulang-bato.
Si Renan Cimafranca sa Regional Epidemiology Statistics and Surveilance Unit (RESSU) sa DOH-7 miingon nga angayan nga mahibaw-an kun diin nagagikan ang maong sakit.
Apil nga susihon kun si kinsa ang mga tawo nga nakahikap-hikap sa bata sa wala pa ug sa dayon niini nga pagkamatay. Kini tungod kay kun tinuod man nga “Meningo†ang sakit may kahigayonan nga natakdan kadtong nakagunit.
Matud ni Cimafranca, angayan nga mahatagan og antibiotic kadtong mga tawo nga miserbisyo sa maong bata aron pagwagtang sa kabalaka nga makatakud pa ang maong sakit sa uban.
Gitambagan usab ni Cimafranca ang mga publiko nga dili mokumpiyansa kun makabaton kini og grabing hilanat ug kinahanglang mokonsulta dayon sa health center aron mahatagan og tambal.
Ang kapitan sa Pulangbato nga si Maria Velasquez miingon nga "Meningococcemia" gyud ang namatyan sa maong bata base sa nakita niini nga death certificate sa Cebu City Medical Center diin didto na-admit ang bata sa wala pa namatay. (BANAT NEWS)