CEBU, Philippines - Angol ang usa ka lalaki nga gitulis sa duha ka wala mailhing tulisan ug midala pa sa iyang motor pasado alas-9 sa miaging gabii didto sa Kingswood Village sa lungsod sa Minglanilla.
Ang naangol naila nga si Vinclyde Rosad, 27, taga Tulay sa lungsod sa Minglanilla.
Base sa imbestigasyon nga gipahigayon ni Insp. Richard Gadingan nga nagsakay sa iyang Yamaha MIO 125 ang biktima dihang kalit siyang gibabagan sa duha ka wala mailhing lalaki nga sakay og motorsiklo.
Sumala pa nga ang backrider nikanaog ug mideklarar og hold-up dungan pagpusil sa wala nga dapi-dapi sa biktima ug dihadiha gikuha ang iyang motor ug gisakyan palayo sa lugar.
Ang biktima gidala sa Minglanilla District Hospital samtang padayon pa ang imbestigasyon sa nahitabo. Sa follow-up operation narekober ang motor sa biktima 300 metros gikan sa crime scene apan ang mga suspetsado wala na nila makit-i.
Samtang usa ka Fretzie Paraiso, 18, taga barangay Pusok, dakbayan sa Lapu-Lapu ang gitulis sa duha ka armadong lalaki samtang kini nag-atang og sakyanan sa dalan U.N. Avenue sa barangay Umapad, dakbayan sa Mandaue sa miaging gabii.
Si PO3 Nersas Baay sa kapolisan sa Presinto 5 sa Mandaue City Police Office (MCPO) mitug-an nga nagpaabot og kasakyan ang biktima dihang giduol ug gitionan kini og kutsilyo sa duha ka mga lalaki ug mikuha sa iyang cellphone ug sensilyo.
Igo na lang midangop sa Presinto 5 sa barangay Opao ang biktima samtang padayon pa ang imbestigasyon bahin niini. (/EIM)(BANAT NEWS)