CEBU, Philippines - Usa ka bata nga nagpangidaron og usa ka tuig ug unom ka bulan ang gikatahong namatay sa sakit nga Meningococcemia sa barangay Pulangbato sa dakbayan sa Sugbo sa Sabado sa gabii.
Ang bata kansang pangalan gipugngan sa Banat News residente sa sitio Manguyab sa nahisgotan nga barangay. Sumala ni Kapitan Maria Velasquez nga nahinabi sa Banat News nga ang bata namatay sa Sabado sa alas-11 sa gabii ug gimando sa pagpalubong dayon niadtong Domingo sa buntag.
Matud pa ni Velasquez nga ang patay nga lawas giputos lakip na ang lungon tungod sa kabalakang makatakod ang kagaw nga nitapot sa bata.
Base sa medical certificate nga nahuptan sa kapitan, Meningococcemia ang hinungdan sa kamatayon sa bata. Gibuhatan gilayon sa maong kapitan og Incident Report ug iya kining gipadala ngadto sa City Health, sa buhatan ni City Councilor Leah Japson ug sa buhatan ni Mayor Michael Rama.
Nabalaka ang kapitan nga mokatap unya sa mga silingan ang maong sakit tungod kay usa ka silingan sa biktima gikataho nga gihilantan sab.
Sumala pa ni Velasquez nga ang pamilya sa bata gipa-inom na sa mga doktor sa Perpetual Soccour Hospital (diin gidala ang bata) og tambal aron dili mokatap ang maong sakit. (/EIM)(BANAT NEWS)