CEBU, Philippines - Gidakop sa kapolisan ang usa ka Korean national nga nag-atubang og kasong pagpanglugos sa hotel nga iyang gipuy-an sa barangay Marigondon, dakbayan sa Lapu-Lapu alas- 2 pasado ang takna kagahapon sa hapon.
Ang gidakop mao si Dewongs Lee nga dunay mga alyas nga Patrick Lee ug Young Yul Lee, 40 , taga 2-1 Pung-Dong, Goyang City, Kyung Ki, South Korea ug temporaryo nga nagpuyo sa 1-Park Hotel sa barangay Marigondon, dakbayan sa Lapu-Lapu.
Si Police Senior Inspector Jimmy Portes, hepe sa Investigation Detection and Management Bureau (IDMB) sa Mandaue City Police Office (MCPO) maoy nangulo sa pagdakop sa suspetsado pinasikad sa warrant of arrest nga giluwatan ni Judge Mercedita Dadole-Ygnacio sa Branch 28 sa Regional Trial Court (RTC) sa dakbayan sa Mandaue tungod sa kasong three counts of rape.
Si SPO3 Marcos Noval, Jr. nga nahinabi sa Banat News miingon nga unang midangop sa ilang buhatan sa IDMB ang 21 anyos nga dalaga nga taga Mainit, Oslob ug temporaryo nga nagpuyo sa sitio Orel, barangay Banilad sa dakbayan sa Mandaue nga biktima sa pagpanglugos sa maong suspetsado.
Dugang warrant of arrest usab nga giluwatan gihapon ni Judge Dadole-Ygnacio sa kaso nga Acts of Lasciviousness ang gipasaka gihapon sa biktima batok sa maong Korean national.
Si Noval miingon nga nagdumili unta sa pagkuyog kay miinsister kining siya si Patrick Lee ug dili Dewongs Lee nga maoy pangalan sa warrant of arrest.
Apan ang biktima mikuyog usab sa pagdakop ug positibo nga miila kaniya nga mao ang milugos kaniya.
Nasuta usab pinaagi sa iyang passport nga ang tinud-anay niyang pangalan Young Yul Lee.
Ang maong dinakpan nga Korean national temporaryo karong gibalhog sulod sa detention cell sa Presinto 2 sa Subangdaku ug gikatakda kining ipresentar sa korte ugmang adlawa. (BANAT NEWS)