CEBU, Philippines - Supak si Mayor Michael Rama nga ihurot pagbaligya ang tanang 179 ka sakyanan sa Cebu City Hall nga napalit pito ka tuig na ang milabay.
Matud ni Mayor Rama nga wala magpasabot nga kay dugay na nga napalit ang usa ka sakyanan nga dili na kini kaayo kapahimuslan.
Si Rama miluwat niining maong pamahayag agi og reaksyon sa sugyot ni Konsehal Roberto “Bob†Cabbarubias nga ibaligya na ang tanang karaang sakyanan sa City Hall aron mopalit sila og bag-ong sakyanan.
Ang mayor miingon nga kun nangaguba na ang mga sakyanan sa gidugayon nga pito ka tuig maisip nga wala kini mamaayo sa pag-atiman ug dunay angay’ng basolon niini.
Gusto ni Mayor Rama nga ang mga maintenance personnel sa City Hall mohimo og pagtimbang-timbang kun hain sa mga sakyanan ang angayan na nga idispatsar. (BANAT NEWS)