CEBU, Philippines - Duha ka mga lalaki parehong nagdala og motorsiklo nga walay mga lisensya ug nakuhaa’g armas ug shabu, nadakpan sa checkpoint sa mga sakop sa Regional Public Safety Company sa dakbayan sa Carcar ug sa lungsod sa Sibonga kagahapong adlawa.
Una nga nasikop si Runiel Indiola, 21, sa checkpoint nga gipahigayon sa barangay Bolinawan dakbayan sa Carcar pasado alas 2 kagahapon sa kaadlawon.
Si PO2 Karl Aldwin Osorio nga nahinabi sa Banat News miingon nga si Indiola nakabantay nga dunay checkpoint maong mibalik kini apan gigukod siya sa mga polis hangtud nga nadakpan.
Igo ra siyang mipakita og lisensya nga expired hinungdan nga girekisa siya sa mga polis ug nakita ang tulo ka pakete nga shabu sa iyang posesyon.
Samtang nasikop sab si Charlemagne Rosales Loway, 30, taga Sabang, Sibonga sa checkpoint sa RPSC sa barangay Abugon sa lungsod sa Sibonga human wa kini makapakita og lisensya ug sa pag-isa sa iyang sinina migimaw ang usa ka kalibre 45 pistola sa iyang hawak. Pakyas siya pagpakita og papeles niini hinungdan sa iyang pagkasikop. (/EIM)(BANAT NEWS)