CEBU, Philippines - Nagplanong mo-surrender ang suspek sa pagpamusil patay sa duha ka mga tawo diha sa Greenbloom Subdivision sa barangay Pitogo, lungsod sa Consolacion nga nahitabo alas 3 pasado ang takna sa miaging sa hapon.
Matud pa ni Konsehal Mario Puao nga gikahinabi sa Banat News nga gikontak sila sa mga kabanay sa suspek nga si Filmar Ibale nga gusto kining mo-surrender apan nahadlok kining pasipad-an mao nga gusto niyang dunay sakop sa media nga mosaksi sa iyang pagtahan.
Si Chief Inspector Marlon Gumabao, hepe sa kapolisan sa maong lungsod maoy nangulo sa hot pursuit operation.
Si Ibale nga giingong nanag-iya og pribadong tulunghaan sa dakbayan sa Mandaue daling miikyas human sa giingong pagpusil niya nila ni Joselito Batocan, 32 , ug Bruce Gomez, 41, mga silingan sa suspetsado sa nahisgotang lungsod.
Matud pa ni PO2 Socrates Borinaga , gikomprontase sa suspek ang asawa ni Batocan nga si Lorena tungod kay nagaras ang sakyanan sa suspek paglabay og bato sa anak niini niadtong Pebrero 4.
Gisumbong ni Lorena sa bana ang pasangil sa suspetsado ngadto sa ilang anak . Matud pa nakig-inom kang Gomez si Batocan nga bag-ohay pang naabot gikan sa trabaho una pa kini miadto sa balay sa suspek aron estoryahon ang kabahin sa pasangil ngadto sa iyang anak.
Apan giingong misangpot kini sa panaglalis nga miresulta sa pagpamusil. Si Batocan nakabaton og siyam ka samad pinusilan sa iyang kalawasan ug tulo usab ka samad pinusilan sa bukobuko ang naangkon ni Gomez nga maoy hinungdan sa ilang kamatayon.
Dali usab nga miikyas ang suspek ug ang iyang pamilya atol sa pag-abot sa kapolisan. (BANAT NEWS)