CEBU, Philippines - Pangulo sa Bureau of Customs, Commissioner John Philip Sevilla mipatawag nila ni Cebu Customs District Collector Roberto Almadin ug Sub Port of Mactan Collector Gerardo Campo alang sa pagpasabot sa nagbaniog nga ga-bukid nga ukay ukay nga anaa sa lungsod sa Cordova.
Buot masayod ni Sevilla kun nganong nakalusot sa Philippine Economic Zone Authority o PEZA sa Mactan ang maong ukay-ukay nga gidili man kini sugod pa niadtong tuig 2008.
Nasuta sa Banat News gikan sa mga opisyal sa Customs Mactan (nga dili magpaila) nga ang maong ukay-ukay iya sa nanirado nang Mactan Land Pearl City usa ka "accredited locator" sa PEZA Mactan kaniadto nga manghimo og mga trapo gamit ang mga "ukay-ukay" gikan sa gawas sa nasud.
Ang maong kompanya nanirado human sa pagdili na pag-import og used clothings ug napundo ang maong mga binandol nga materyales sa ilang bodega.
Apan ang PEZA Fire Department mipahimangno nga fire hazard kini sa gitukod nga building sa nakapalit sa pwesto nga Verlo Construction.
Tungod niini gidala sa yarda sa Verlo Construction sa barangay Pilipog, Cordova ang maong mga ukay-ukay ug gipamaligya kini ngadto sa publiko.
Gihimakak sa BOC sa Mactan nga kabahin kini sa donasyon alang sa biktima sa bagyong Yolanda.
Kahinumduman nga gikagubtan sa mga residente sa Cordova ug Lapu-Lapu City ang maong ukay-ukay nga gidudahan nga alang unta sa mga biktima sa bagyong Yolanda. (BANAT NEWS)